د هند په شمال ختیځ کې د مانیپور په لرې پروت ایالت کې په قومي شخړو کې د وژل شویو کسانو شمېر ۵۴ تنو ته په داسې حال کې ورسېد چې د شخړې د ارامولو لپاره زرګونه پوځیان دې ایالت ته استول شوي دي. خو د پوځ او امنیتي ځواکونو د شتون سره سره، تېره شپه یو ځل بیا تازه شخړې شوي دي. چارواکو د نارامۍ د کابو کولو لپاره په سیمې کې د انټرنېټ خدمات بند کړي او په جدي قضیو کې یې ځای پر ځای د وژلو امر هم کړی. د مانیپور ایالت د پولیسو مشر خبرداری ورکړی چې بلواګرو د پولیسو د څو مرکزونو څخه وسلې او مهمات پټ کړي او تېره شپه په سیمه کې وضعیت جدي ښودل شوی. هندي رسنیو ویلي چې تر دې د مه د ۵۴ کسانو مړي مرده خانو ته وړل شوي او ښایي د وژل شویو او ټپي شويو شمېر لوړ شي ځکه لا هم چارواکي یو شمیر سیمو ته په ورتګ کې کامیاب شوي نه دي.
