د حج او اوقافو وزارت وايي، تمه ده چې سږ کال له افغانستان څخه د ۸ زره ښځو په ګډون ۳۰ زره کسان د حج په مراسمو کې ګډون وکړي. د دغه وزارت چارواکي وايي، د حاجیانو لپاره د اسانتیاوو د برابرولو لپاره لازم تدابیر نیول شوي دي. د دوى په وينا، د حج د مراسمو د لا ښه تنظيم په موخه يې د هغو ښوونکو لپاره چې په دې مراسمو کې له حاجيانو سره مل وي، د پوهاوي اووه ورځنى سيمينار پيل کړی دی. د دغه وزارت د معلوماتو له مخې، په دغه سیمینار کې به د لارښوونو او همدا راز د حاجیانو د ستونزو په اړه معلومات ورکړل شي، څو حاجیان د حج په مراسمو کې له کومې ستونزې سره مخ نشي. دا په داسې حال کې ده، چې تېر کال د حج د مراسمو پر مهال حاجيان له ستونزو سره مخ وو، خو اوس د حج او اوقافو وزارت وايي، هڅه کوي، چې حاجيان له ستونزو سره مخ نشي او ټولې اسانتياوې ورته برابرې کړي.
