ټاکل شوې ده چې د پاسپورټ د وېش ظرفیت په ورځ کې تر ۱۵ زره ټوکو پورې لوړ شي. د پاسپورټ ریاست ویاند نورالله پتمن وايي چې دمګړۍ په ټول هېواد کې په ورځ ۸ تر ۱۰ زره ټوکه پاسپورټونه وېشل کېږي او د دغه شمېر زیاتوالي لپاره هڅې روانې دي. بلخوا دغه ریاست وايي چې د ۱۴۰۱ لمریز کال له پیله تراوسه، ۲۰۰ تنه د جعل او کمېشن کارۍ په تور نیول شوي دي. هاخوا، د کابل یو شمېر اوسېدونکي وایي، چې په بانکونو کې د پاسپورټ د پیسو په سپارلو کې له جدي ستونزې سره مخ دي. پر دې سربېره، د پاسپورټ ریاست ډاډ ورکوي، چې بانکونو ته به د پیسو د ورکړې د ستونزې د حل لپاره له یو شمېر خصوصي بانکونو سره تړون لاسلیک کړي.
