په افغانستان کې د خوړو نړیوال پروګرام اعلان کړی چې د سختو مالي خنډونو له امله اړ شوی چې په اپریل میاشت کې په دغه هېواد کې له څلورو میلیونو اړمنو کسانو سره د خوراکي توکو مرستې بندې کړي. دغه سازمان خبرداری ورکړی چې که ژر تر ژره نورې مرستې ونه رسیږی، نو اړ به شی چې د می په میاشت کې له څلورو میلیونو نورو خلکو سره د خوراکی توکو مرستې کمې کړي. د ملګرو ملتونو د مرستو د دغه دفتر د نوي راپور له مخې، د پلان له مخې په پام کې وه چې په اپریل میاشت کې له ۱۳ میلیونو انسانانو سره د خوراکي توکو مرستې وشي، خو د بودیجې د کمښت له امله په دې میاشت کې یوازې ۹ میلیونه کسانو ته مرستې ورکړل شوې. د خوړو د نړیوال پروګرام د شمېرو له مخې، په افغانستان کې د ۲۰۲۲ کال له نوامبر څخه د ۲۰۲۳ کال تر مارچ میاشتې پورې شاوخوا ۲۰ میلیونه کسان د خوراکي توکو له سختې ناامنۍ سره مخامخ شوي چې بیړنیو مرستو ته اړتیا لري. د دغه سازمان د معلوماتو له مخې، د درې میلیونه دوه سوه زره ماشومانو په ګډون چې عمرونه یې له پنځو کلونو کم دي، څلور میلیونه کسان په حاد خوارځواکۍ اخته دي. په ټولیزه توګه، ملګرو ملتونو ۲۸.۳ میلیونه وګړي، چې د افغانستان د نفوس دوه پر دریمه برخه جوړوي، په مختلفو برخو کې بشري مرستو ته د اړتیا په توګه پیژندلي دي.
