د بښنې نړیوال سازمان په خپل کلني راپور کې ویلي چې په افغانستان کې بشري حقونو وضعیت لا خراب شوی دی. د بښنې نړیوال سازمان په دغه راپور کې په نړۍ او په ځانګړې توګه په افغانستان کې د بشري حقونو وضعیت څېړلی دی. د دغه سازمان په راپور کې راغلي چې په تېرو دوو کلونو کې په افغانستان کې وضعیت په ځانګړې توګه د بشري حقونو او رسنیو د ازادۍ وضعیت محدود شوی دی. د بښنې نړیوال سازمان په دغه راپور کې نړۍ د بشري حقونو په مسئله کې په دوه مخۍ تورنه کړې او د ځینو لوېدیځو هېوادونو دوه مخی چلند یې د افغانستان او اوکراین له کډوالو سره پرتله کړی دی. په همدې حال کې د امریکا د بهرنیو چارو وزیر په واشنګټن کې د ډیموکراسۍ په جلسه کې په افغانستان کې د ښځو د فعالیتونو ستاینه کړې ده. خو بلخوا په قطر کې د اسلامي امارت د سیاسي دفتر مشر وايي، د ټولو افغانانو حقوق تر بل هر وخت ښه تامين شوي دي. د بښنې نړیوال سازمان په خپل کلني راپور کې په نړۍ او افغانستان کې د خلکو د کډوالۍ او بېځایه کېدو پر زیاتوالي هم بحث کړی دی. د دغه بنسټ د شمېرو پر بنسټ، د تېر کال تر پيله په افغانستان کې ۳،۸ مېلیونه کسان بې ځایه شوي وو.
