د راپورونو پر بنسټ، په ترکیه او سوریه کې د زلزلې له امله د مړو شمېر له ۲۸ زره کسانو اوښتی او تر ۸۵ زره ډېر کسان ټپیان شوي دي. د تېرې دوشنبې په سهار دوو پرلهپسې سختو زلزلو د ترکیې سوېلختیځ او د سوریې لوېدیځې سیمې ولړزولې. د ترکيې ځایي چارواکو د معلوماتو له مخې، یادو زلزلو د دغه هېواد لس ولایتونه سخت ځپلي او درانه مالي او ځاني زیانونه یې اړولي دي. د ترکیې انادولو اژانس د دغه هېواد د مرستیال ولسمشر فوات اوکتای په حواله خبر ورکړی چې په دغه هېواد کې د وروستۍ زلزلې له امله ۲۵ زره کسان مړه او له ۸۰ زره ډېر ژوبل شوي دي. سرچینې زیاته کړې، دغهراز له ۶ زره ډېر کورونه او دنګې ودانۍ ړنګې شوې، ۹۳ زره کسان ژغورل شوي او ډیر نور اوس هم تر ړنګو ودانیو لاندې دي. د ترکیې حکومت ویلي چې ۱۶۶ زره کورني او بهرني ژغورونکي د ژغورنې په عملیاتو کې برخه اخلي. دغه راز ځایي چارواکو ویلي چې له لومړۍ زلزلې وروسته تر ۲۰۰ پورې نورې وړې زلزلې هم شوې دي. د یادونې ده، دا شمېرې نهايي نه دي او د زياتېدو اټکل یې شته.
