د پاکستان د بلوچستان په کوهلو سیمه کې پر پاکستاني پوځيانو په یوه بمي چاودنه کې د یوه جګړن په ګډون دوه پوځیان وژل شوي او درې نور ټپيان دي. د کوهلو سیمې یوه ځايي چاراوکي ویلي دا پېښه پرون شوې ده. دې سیمه کې په همداسې یوه بله پېښه کې د یوه ملکي کس د ټپي کېدو خبر هم ورکړ شوی. د پاکستان پوځ د عامه اړیکو څانګې ویلي چې د چاودنې ښکار شوي امنیتي کسان دې سیمه کې د وسله والو ډلو پر وړاندې په عملیاتو بوخت وو. د دغه برید مسوولیت د بېلتونپالو بلوڅانو د خپلواکۍ پوځ په غاړه اخیستی. تر یادو پېښو څو ساعته وړاندې په ورڅېرمه ‘ډېره بګټي’ کې د ناپېژانده وسله والو برید کې د ملېشه ځواک یو سرتېری وژل شوی او دوه تنه نور ټپيان شوي دي.
