د افغانستان په اړه د مسکو ناستې په پنځمه غونډه کې د سیمې هېوادونو د ملي امنیت شورا سلاکارانو د افغانستان پر وضعیت اندېښنه ښودلې. د ایران د ملي امنیت شورا منشي علي شمخاني دې ناسته کې په افغانستان کې د ټول ګډونه حکومت نه جوړولو له امله پر ا.ا نیوکه کړې. شمخاني ویلي د افغانستان په حکومت کې د ټولو قومونو او ګوندونو د ونډې او د افغانستان د ثبات اړوند په نورو برخو کې د بېلابېلو قشرونو د ګډون اړوند نور خنډ او ځنډ به نه یوازې ګټه ونه کړي بلکې د افغانستان اوسنۍ ستونزې به لا ډېرې کړي. هغه د افغانستان له پولو هاخوا د ناامنیو د غځېدو په اړه هم د غونډې ګډونوالو ته خبرداری ورکړ او ویلي یې دي چې باید اجازه ورنکړل شي هغه ناامنۍ چې افغانان ورسره مخامخ دي د سیمې په ناامنۍ واوړي. نوموړي یو ځل بیا امریکا تورنه کړه چې په پرله پسې ډول هڅه کوي افغانستان د ناامنۍ او ترهګرۍ پر مرکز بدل کړي. شمخاني ویلي ایران په امریکا کې د افغانستان د کنګل شویو شتمنیو ازادول غواړي او دا شتمنۍ باید د امریکا لخوا بندیزونو سره مخامخ نه شي.
