امریکا اعلان کړی چې پر پولنډ یې د ۱۰ میلیارد ډالرو په ارزښت د هیمارس د ۱۸ راکټي سیستمونو پلور چې مهمات او نور تجهیزات هم پکې شامل دي، منظور کړی دی. د امریکا دفاعي امنیتي همکارۍ ادارې په یو بیان کې ویلي، د دغو وسلو په پلور سره به نه یوازې د قابلیتونو د لوړېدو په برخه کې د پولنډ اهداف ترلاسه شي بلکې له امریکا او نورو متحدینو سره به د یاد هېواد د همکاریو قابلیت زیات شي. د هیمارس راکټي سیستم په اوکراین کې د روسیې د یرغل پر وړاندې مهم رول لوبولی دی او کیېف ته یې دا قدرت ورکړی چې د روسیې په ډیپو ګانو او نورو اهدافو دقیق بریدونه وکړي. پر پولنډ د هیمارس راکټي سیستمونو د پلور اعلان په داسې حال کې کېږي چې پر اوکراین د روسیې له برید څخه کابو یو نیم کال کیږي او پولنډ له اوکراین سره اوږده پوله لري. پولنډ چې د اروپايي ټولنې غړی هیواد هم دی، په وروستیو میاشتو کې د خپلو دفاعي قابلیتونو د لوړیدو لپاره د وسلو یو شمېر تړونونه لاسلیک کړي دي.
