د ترکیې او سوریې چارواکي وایي چې په دغو هېوادونو کې د دوو زلزلو له امله د مړو شویو کسانو شمېره نږدې څلور زرو ته رسیدلې او شاوخوا ۲۰ زره نور ژوبل شوي دي. د ترکیې انادولو اژانس ویلي چې دا زلزله پرون سهار وخته په شاوخوا ۴ بجو او ۲۰ دقیقو، په داسې حال کې چې خلک په خواږه خوب ویده وو، وشوه. د امریکا د ځمکې پېژندنې ادارې ویلي چې د رېښتر په کچه د لومړۍ زلزلې شدت ۷.۸ او د دویمې یې ۷.۵ و، چې دویمه زلزله له لومړۍ هغې څو دقیقې وروسته وشوه. د دغه هېواد د بېړنیو حالاتو ادارې ویلي چې تر اوسه نږدې ۲۵۰۰ کسان مړه او تر ۱۵ زرو ډېر ژوبل شوي دي. سرچینې زیاته کړې چې زلزلې د دغه هېواد لس سیمې ځپلي او زرګونه دنګې او وړې ودانۍ یې ړنګې کړې دي. بلخوا په سوریه کې هم تر ۱۵۰۰ ډېر کسان مړه شوي او شاوخوا پنځه زره نور ژوبل شوي دي. چارواکو ویلي چې د مړو او ژوبلو شمېر کې ښایي بدلون راشي ځکه چې د ژغورنې او لټون عمله کار کوي.
