د کانونو او پټرولیم وزارت وايي، د قشقرې كان له څلورو څاه ګانو څخه تر دې دمه د نږدې ۳۰ میلیونه ډالرو په ارزښت نفتي توکي پلورل شوي دي. د راپورونو له مخې، د کانونو او پټرولیم وزارت د روان کال د وري میاشتې په ۱۹مه د قشقرې د تېلو کان د استخراجولو کار پیل کړ او له دغه كان څخه هره ورځ د ۱۵۰ زره امریکایي ډالرو په ارزښت ۲۰۰ ټنه تېل استخراجېږي. د کانونو او پټرولیم وزارت له جزئیاتو ورکولو پرته په خپله ټویټرپاڼه لیکلي چې د قشقرې كان له څلورو څاه ګانو څخه تر دې دمه د نږدې ۳۰ میلیونه ډالرو په ارزښت نفتي توکې پلورل شوي دي. د امو سيند د نفتو زېرمه د هېواد په شمال کې چی یوه برخه يې په سرپل او بله برخه يې په فارياب کې ده د تېلو درې بلاکونه لري.
