د بشري حقونو په برخه کې د ملګرو ملتونو د سرمنشي مرستيال مارتين ګریفټس وایي، افغانستان سره د نړیوالې ټولنې مرستې به دوامداره او غیر مشروطې وي. نوموړي دا څرګندونې د پوهنې وزارت له سرپرست مولوي حبیب الله آغا سره د لیدنې پر مهال کړې دي. مارتين ګريفټس په دغه کتنه کې ډاډ ورکړ، چې له افغانستان سره د نړیوالې ټولنې مرستې به دوامداره او غير مشروطې وي. د نوموړي په وينا، سیاسي تعاملات به هېڅکله د یادو مرستو لړۍ ټکنۍ نه کړي. د پوهنې وزارت سرپرست په افغانستان کې د نړيوالې ټولنې ښوونیز فعاليتونه وستايل او ژمنه یې وکړه، چې د پوهنې وزارت به په خپل ټول توان سره هڅه وکړي تر څو نړیوالو خیریه بنسټونو ته د فعالیت ټولې اسانتیاوې برابرې او په دې برخه کې د یو همغږي کوونکي او تسهيل کوونکي جهت رول ولوبوي. د يادونې وړ ده چې مارتين ګريفټس تر دې وړاندې د ا.ا له يو شمېر نورو لوړو پوړيو چارواکو سره هم کتلي وو.
