د اروپايي ټولنې د بهرني سیاست مشر جوزیف بوریل وايي، له ملګرو ملتونو سره یو ځای به دغه ټولنه د افغان وګړو په ځانګړي ډول د ښځو ملاتړ ته دوام ورکړي. بوریل په بروکسل کې د ملګرو ملتونو د سرمنشي له مرستیالې امنې محمد سره د کتنې عکس هم خپور کړی دی. د اروپايي ټولنې د بهرني سیاست مشر لیکلي، چې له مېرمن امنې سره یې د افغانستان تر سفر وروسته معلوماتي بحثونه درلودل. امنې محمد چې د ملګرو ملتونو د یوه پلاوي مشري کوله، تېره اونۍ افغانستان ته راغلې وه چې د ښځو او نجونو پر کار او تعلیم د بندیزونو په اړه يې د ا.ا له چارواکو سره خبرې وکړې.
