په امریکا کې د وسله والو بریدونو په دوام کې په تازه دوو نورو امنیتي پېښو کې د دوو زده کوونکو په ګډون پنځه کسان وژل شوي دي. امریکایي رسنیو خبر ورکړی چې تازه پېښه پرون د واشنګټن ایالت په یاکیما ښار کې رامنځته شوې ده. سرچینې زیاته کړې چې یوه وسله وال کسان د یوې مغازې مخې ته درې کسان په ډزو وژلي او په خپله له سیمې تښتېدلی دی. د یاکیما ښار پولیسو زیاته کړې، دې کس یو تن په یوې هټۍ، دویم کس د هټۍ مخ ته او دریم کس یو څو ګامه هاخوا په ډزو ویشتی دی. په یوه بله پېښه کې د امریکا په آیووا ایالت کې له خطر سره د مخو ځوانانو لپاره د یو روزنیز پروګرام پرمهال په ډزو کې دوه زده کوونکي وژل شوي او د پروګرام بنسټ ایښودونکی سخت ټپي شوی دی. دا په داسې حال کې ده چې وړمه ورځ هم په کالیفورنیا ایالت کې د ډزو په دوو جلا پېښو کې ۱۸ کسانو ته مرګ ژوبله اوښتې وه. له دې پېښو وروسته د امریکا ولسمشر جو بایډن یو ځل بیا له کانګرس غوښتي چې د تهاجمي وسلو د بندولو په اړه عاجل اقدام وکړي.
