د ملګرو ملتونو د بشري مرستو مرستیال یو ځل بیا دافغانستان له ا.ا وغوښتل چې په موسسو کې ښځو ته د کار اجازه ورکړي ځکه ښځو او ماشومانو ته د مرستې رسولو لپاره د ښځینه کارمندانو شتون یوه اړتیا ده. له ارګ څخه په یوه خپره شوې خبرپاڼه کې راغلي چې د ریاست الوزرا اداري مرستیال مولوي عبدالسلام حنفي پرون مازدیګر په بشردوستانه چارو کې د ملګرو ملتونو د سرمنشي مرستیال مارټین ګرېفېټس په مشرۍ پلاوي سره وکتل. سرچینې زیاته کړې، په دې کتنه کې چې په ارګ کې ترسره شوه، په افغانستان کې د ملګرو ملتونو د بېلابېلو ادارو یو شمېر مسوولینو هم په کې حضور درلود. د سرچینې د معلوماتو له مخې، ګریفیټس په دې لیدنه کې وویل، افغانستان ته يې د سفر موخه په بشر دوستانه فعالیتونو باندې تمرکز دی چې په ښه توګه ادامه ومومي.نوموړي وویل، له ۲۸ میلیون افغانانو سره د مرستې لپاره په ۲۰۲۳ میلادي کال کې یې ۴،۶ میلیارد ډالر غوښتي چې د نړۍ په کچه ددوی لوی فعالیت تشکیلوي. له دې امله ښځو او ماشومانو ته د مرستې رسولو لپاره د ښځینه کارمندانو شتون یوه اړتیا ده.
