د قطر د بهرنیو چارو وزیر شیخ محمد بن عبدالرحمن آل ثاني وايي، د قطر حکومت د افغان مېرمنو د زده کړو او کار ملاتړی دی. دغه جګپوړي قطري چارواکي ویلي، دوحه پر افغان مېرمنو دغه ډول بندیزونو ته له مذهبي یا کلتوري نظره نه شي کتلی او ټینګار یې دا دی چې هېواد یې اوسمهال له نورو مسلمانو هېوادونو سره له دې وضعیت سره د (مبارزې) په تړاو په سلامشور بوخت دی. شیخ محمد په دې مرکه نېغ افغان ښځو ته په خطاب کې ویلي چې قطر ورسره ولاړ دی. نوموړی وايي، د طالبانو په دې پرېکړو ناهیلی شوی دی، خو په خبرو او مذاکرې یې ټینګار کړی دی. شیخ محمد په دې مرکه کې ویلي، هڅه یې کړې چې له کندهار سره اړیکه ونیسي او خبرې ورسره وکړي، خو لا تر اوسه نه دي بریالي شوي، خو له اسلامي او د سیمې له هېوادونو سره خپلې سلامشورې روانې ساتي.
