د ملي پراختیا شرکت وایي، تازه د کانونو او پټرولیم وزارت لهخوا د بلخاب د ډبرو سکرو د ایستلو مسوولیت ورسپارل شوی دی. په شمال حوزه کې د دې شرکت یو مسوول فرید عظیم وایي، د یادې ادارې لهخوا د بلخاب د ډبرو سکرو لومړني کارونه پیل شوي دي. د دوی په وینا، د دې چارې په پیلېدو سره به څه باندې دوه زره کسانو ته د کار زمینه برابره شي او عاید به یې هم په ملي پروژو او په ځانګړې توګه په قوش تېپې کانال کې ولګول شي. په ورته وخت کې د کانونو او صنایعو خونه وايي، د ډبرو سکرو د ایستنې چارې باید معیاري شي. د ملي پراختیا شرکت د مالوماتو له مخې، یوازې د بلخاب د ډبرو سکرو په دوو حوزو کې د ډبرو سکرو ذخیرې په احتمالي توګه یو نیم میلیار ټن ته رسېږي.
