د ایران د پوځ یو جنرال ومنله چې په دغه هېواد کې د روانو لاریونونو پر مهال په بې ثباتیو کې تر ۳۰۰ ډېر کسان وژل شوي دي. دا لومړی ځل دی چې په ایران کې د لاریونونو له پيل راهېسې یو ایراني چارواکی د وژل شویو کسانو په اړه داسې رسمي ارقام خپروي. خو د ایران د بشري حقونو فعالان، چې دا لاریونونه څارې او په اړه یې معلومات ټولوي، وايي چې د لاریونونو له پيل راهېسې تر دې دمه ۴۵۱ ولسي کسان چې ۶۴ کسان تر ۱۸ کالونو کم عمر لري او ۶۰ امنیتي ځواکونه وژل شوي دي. دغه ایراني جنرال د ایران د نورو چارواکو دا خبره تکرار کړه چې ګنې لویدیځ هېوادونه او سعودي عربستان دا لاریونو کوونکي پاروي، خو دوی د خپلې دغې ادعا د اثبات لپاره شواهد نه وړاندې کوي.
