د سره صلیب نړیواله کمېټه وايي، د افغانستان د وګړو نیمايي نفوس د خوړو له جدي نه خوندیتوب سره مخامخ دي. دغه سازمان پرون ویلي چې اقتصادي ستونزو او د ژمي رارسېدو په افغانستان کې د میلیونونو کسانو ژوند له ګواښ سره مخ کړی دی. یاد سازمان ټینګار کړی چې د وضعیت خرابېدو مخنیوي لپاره د نړیوالې ټولنې بېړني ملاتړ ته اړتیا ده. د سره صلیب نړیوالې کمېټې عملیاتي مسؤل مارتین شوب پر خپله ټویټر پاڼه لیکلي، په افغانستان کې د اساسي توکو بیو لوړېدل، د زیاتو خلکو لپاره د ژوند چارې ستونزمنې کړي دي. هغه همدارنګه ټینګار کړی چې په افغانستان کې د اړمنو او زیانمن شوو خلکو د ملاتړ زیاتوالی زیات مهم دی. مارتین شوب چې په دې وروستیو کې افغانستان ته سفر راغلی، ویلي چې د څو لسیزو جګړو او اقتصادي ستونزو له امله د افغانستان د خلکو ژوند سخت زیان لیدلی دی. د شوب د معلوماتو په اساس په افغانستان کې ۲۴ میلیون خلک بشري مرستو ته اړتیا لري او نژدې ۲۰ میلیون خلک د خوړو له کمښت سره مخ دي. د سره صلیب نړیوالې کمېټې عملیاتي مسؤل ویلي چې په افغانستان کې زرګونو کسانو خپلې دندې له لاسه ورکړي او ۹۰ سلنه خلک په ورځ کې تر ۱.۹ نه ډالره کم عاید لري.
