د افغانستان لپاره د ملګرو ملتونو د بشري مرستو همغږی کوونکی رامز الاكبروف وايي د افغانستان د خلکو اقتصادي حالت خورا نازک دی او راتلونکي زېږديز کال کې ۶۵ سلنه افغانان نړیوالو بشري مرستو ته اړتيا لري. نوموړي دا څرګندونې په خپل هغه راپور کې کړې چې پرون د افغانستان د اقتصادي وضعیت په اړه د ملګرو ملتونو دامنیت شورا غير رسمي غونډې ته يې وړاندې کړ. هغه چی د افغانستان لپاره د ملګرو ملتونو د سرمنشي د ځانګړي استازي مرستیال هم دی، ویلي چې زده کړو ته د نجونو پر لاسرسي او د ښځو پر کار بنديزونو په کلني ډول د افغانستان اقتصاد ته له یوه میلیارد ډالرو ډیر زیان اړولی دی. رامز الاكبروف راتلونکی کال هم له اقتصادي پلوه ننګونکی وباله او ویې ویل ۱۹ میلیونه افغانان راتلونکي کال کې سخت اړمن او له دې ډلې شپږ میلیونه به بېړنیو مرستو ته اړتيا ولري. د نوموړي په وينا پرلپسې وچکالۍ افغانستان ځپلی د نظام بدلون لا ډېر اقتصاد او ټولنیزه اډانه ویجاړه کړه او اقليمي بدلون او طبيعي پیښې نور هغه لاملونه و چې د افغانستان اقتصاد له ګواښ سره مخ کړ.
