د پاکستان د کورنیو چارو وزارت په دغه هېواد کې افغانانو او ټولو بهرنيانو ته چې قانوني اسناد نه لري، خبرداری ورکړی چې د روان زېږديز کال تر پایه له دغه هېواده ووځي. د پاکستان د کورنیو چارو وزارت پر خپله وېبپاڼه لیکلي، هغه بهرنیان چې په دغه هېواد کې یې د ویزو موده پای ته رسېدلې، خو لا هم په کې پاتې دي، ویزې او قانوني اسناد دې واخلي او یا دې ووځي. دسرچينې په وینا، که دغه کسان د روان میلادي کال د ډيسمبر میاشتې تر ۳۱مې نېټې مخکې له پاکستان څخه ونه وځي، وروسته په درې کالـه بـنـد محكومېدلی شي. د پاکستاني حکومت دې پرېکړې هغه افغانان چې په پاکستان کې کاناډا ته د تلو انتظار باسي، اندېښمن كړي دي. په افغانستان کې د تېر کال په اګست کې د جمهوري نظام له ړنګېدو وروسته زرگونه افغانان پاکستان ته تللي او هلته نورو بهرنيو هېوادونو ته د تګ لپاره انتظار دي.
