د ننګرهار ولایت یو شمېر مسوولین وایي، هېڅوک نه شي کولی چې په یو او بل نوم د ایران او افغانستان ترمنځ اختلافاتو ته لمن ووهي. دغه څرګندونې د ننګرهار ولايت د اطلاعاتو او کلتور ریيس مولوي نورمحمد حنيف او د بهرنیو چارو ریيس مولوي احمد په جلال آباد کې د ايران له قونسل سره په کتنه کې کړې دي. د ننګرهار ولایت اطلاعاتو او کلتور ریيس نورمحمد حنيف په دې ناسته کې ویلي، چې د افغانستان او ايران خلک تاريخي او فرهنګي اړيکو درلودلو تر څنګ ديني مشترکات هم لري، چې هيڅوک نه شي کولی د دواړو هېوادونو د خلکو ترمنځ په يو او بل نوم اختلافاتو ته لمن ووهي. په همدې حال کې د ایران قونسل مجید صادقي دولت آبادي د دواړو هېوادو د تاريخي او فرهنګي اړيکو په لا پياوړتيا ټینګار وکړ او زیاته یې کړه چې په اوسنيو حالاتو کې د ايران او افغانستان د خلکو تر منځ بايد په ټولو برخو کې اړيکې پياوړي او د دواړو هېوادونو خلک بايد په خپلو کې د راکړې ورکړې (سوداګرۍ) او د دواړو هېوادونو د ګډ فرهنګ په برخه کې لا کوټلي ګامونه پورته کړي.
