د افغانستان سرپرست حکومت وایي چې کابینې د نشه یي توکو او مسکراتو د قاچاق پر وړاندې د مبارزې د ګډې کړنلارې د څېړلو پریکړه کړې ده. له ارګ څخه په خپره شوې خبرپانه کې راغلي، د رییس الوزراء په مشرۍ د کابینې غونډه کې د نشه يي توکو او مسکراتو د قاچاقو پر وړاندې د مبارزې د ګډې کړنلارې د څېړلو پرېکړه شوې ده. سرچینې زیاته کړې، د پرېکړې له مخې، ټاکل شوی پلاوی يې باید پایله د شرعي اړخونو له روښانولو وروسته د ریاست الوزراء له مقام سره شریکه کړي. دا په داسې حال کې ده، چې د ملګرو ملتونو د نشه یي توکو پر وړاندې د مبارزې ادارې ویلي چې په افغانستان کې د تېر کال په پرتله د کوکنارو کر کیله کې ۳۲ سلنه زیاتوالی راغلی دی.
