د بهرنیو چارو وزارت ویلي چې د ملګرو ملتونو د کډوالو چارو د عالي کمېشنرۍ مرستیال د بهرنیو چارو له سرپرست وزیر سره په کتنه کې ویلي، چې افغانستان اوس خوندي دی او کډوالو ته په کار ده، چې خپلو سیمو او بانډو ته ستانه شي. د بهرنیو چارو وزارت ویاند پر خپل ټویټر لیکلي، د ملګرو ملتونو د کډوالو چارو د عالي کمېشنرۍ مرستیال رؤوف مازو د یو پلاوي په مشرۍ د بهرنیو چارو وزارت له سرپرست سره وکتل. سرچینې زیاته کړې، د بهرنیو چارو وزارت سرپرست په دغه کتنه کې وویل، کډوال هغه مهال هېواد ته ستنېږي چې جګړه نه وي او اقتصادي وضعیت ښه وي. متقي ویلي، اوس جګړه ختمه شوې، خو د اقتصاد په برخه کې د امریکا له لوري اقتصادي بندیزونه او د افغانانو شتمنۍ کنګل کول د دې بهیر د ټکني کېدو لامل ګرځېدلی دی. هغه هیله څرګنده کړې، چې له هېواد څخه بهر د افغان کډوالو ستونزو ته په وخت رسېدنه وشي. د ملګرو ملتونو د کډوالو چارو د عالي کمېشنرۍ مرستیال په دغه کتنه کې وويل چې په تېر یوه کال کې، زیات شمېر کډوال هېواد ته راستانه شوي، چې د هغوی له جملې له ۶۰ زره کډوالو سره د ملګرو ملتونو د کډوالو چارو د عالي کمېشنرۍ مرستې ترسره شوې دي.
