د افغانستان لپاره د ملګرو ملتونو د ځانګړې استازولۍ یا یوناما مشره روزا اوتونبایوا وايي، افغانستان کې پر ښځو او نجونو لګېدلي محدودیتونه افغانانو ته د بشري مرستو رسولو بهیر اغېزمنوي. اوتونبایوا ویلي، چې تل یې د ا.ا له چارواکو سره د لیدنو پر مهال د هغوی له لوري د ښځو او نجونو پر زدهکړو او کار د لګېدلیو محدودیتونو د ناوړه پایلو په اړه خبرداری ورکړی دی. د هغې په خبره، نړیواله ټولنه د افغانانو وضعیت ته په پام هغوی ته د مرستو رسولو لپاره چمتووالی لري، خو د اوسني حکومت له لوري لګېدلي محدودیتونه د دغو مرستو پر وړاندې خنډونه جوړوي او دا به افغانستان له پرمختګ نه لرې وساتي. د یوناما مشره په افغانستان کې روان بشري ناورین د اندېښنې وړ بولي او ټینګار کوي چې مخنیوی یې نړیوالو مرستو ته اړتیا لري. د نوموړې په وینا، ملګري ملتونه په پام کې لري چې د دغه وضعیت د کنټرول لپاره لږترلږه ۲۸ میلیونه افغانانو ته مرستې ورسوي.
