په ترکیه کې د افغانستان سفارت وایي چې د افغانانو د وضعیت او ورته د اوښتي زیانونو معلومولو په موخه یې یو پلاوی د دغه هېواد دزلزلې ساحې ته استولی دی. په انقره کې د افغانستان د سفارت مرستیال محمد مصدق فقیري ویلي، استول شوی پلاوی به هلته خپلې څېړنې او پلټنې کوي او خپل راپور او معلومات به سفارت سره شکوي .هغه زیاته کړې چې دغه معلومات به بیا له رسنیو سره شریک شي. نوموړي ویلي، چې اوسمهال د ترکیې د حکومت اونړۍوالو لومړیتوب د مرستو رسونه او د ژغورنې عملیات دي. د فقیري په وینا، د غیر رسمي، غیر نهایي او نا تایید شوي راپورونو له مخې، چې هلته له مېشتو افغانانو یې ترلاسه کړي، ښایي تر سلو پورې افغان وګړي دې زلزله کې ژوند له لاسه ورکړی وي. تر دې مخکې ځینو رسنیو هلته د مېشتو افغانانو په حواله خبر ورکړی چې تر سلو پورې افغانانو ته د زلزلې له امله مرګ ژوبله اوښتې ده.
