ا.ا هغه اوازې رد کړې چې ګوندې سعودي عربستان خپل سفارت کابل کې بند کړی او وایي چې هغوی د لنډمهاله روزنې په موخه تللي دي. تر دې مخکې په ټولنیزو شبکو کې داسې معلومات خپاره شوي چې سعودي د امنیتي ګواښونو له امله په کابل کې خپل سفارت تړلی او کارکوونکي یې پاکستان ته لیږدولي دي. خو د ا.ا ویاند وايي چې د سعودي سفارت کارکوونکي د روزنې په پار کابل پرېښی دی او ډېر ژر به بېرته راستانه شي. نوموړي د امنیتي ګواښونو اوازې هم رد کړې او وې ویل چې په کابل کې ګڼ شمېر سفارتونه فعال دي او دوی ورسره ښې اړیکې لري. که څه هم تر اوسه کوم هېواد ا.ا په رسمیت نه دی پېژندلی، خو ځینې هېوادونه لکه چین، روسیه، جاپان، ترکیه، پاکستان، ایران، ازبکستان، ترکمنستان، اروپایي اتحادیه، یوناما او ځينې نور په کابل کې ډیپلوماټیک فعالیتونه لري.
