د ملګرو ملتونو د سرمنشي په استازیتوب د دوو ښځو په ګډون ددغه سازمان درې چارواکي په افغانستان کې د ښځو او نجونو د حقونو په تړاو له سرپرست حکومت سره د خبرو لپاره کابل ته راغلي دي. په افغانستان کې د ملګرو ملتونو سیاسي استازولۍ (یوناما) په یوه خبرپاڼه کې ویلي، په دې پلاوي کې د ملګرو ملتونو د سرمنشي مرستیاله امنه محمد، د دغه سازمان د ښځو ددفتر اجرایوي مشره سیما بحوث او د سیاسي چارو او سولې جوړولو چارو کې د ملګرو ملتونو د سرمنشي مرستیال خالد خیاري شامل دي. په خبرپاڼه کې راغلي، دغه پلاوي تر اوسه په ګڼو ګاونډیو هېوادونو، خلیج او بهر کې ناستې کړې دي. همدا شان د اسلامي کانفرانس سازمان، اسلامي پرمختیايي بانک او په انقره کې د افغان ښځو له ډلو سره یې کتلي دي. په ورته وخت کې دوی د قطر په دوحه کې د افغانستان لپاره له ځانګړو استازو او سفیرانو سره لیده کاته کړي دي. په خبرپاڼه کې راغلي چې د دوی د بحثونو پایله کې ټول پر دې نظر دي چې د افغان ښځو پر وړاندې د اوسنیو ستونزو د ختمولو لپاره مثبت ګامونه واخیستل شي.
