د هرات حکومتي مسوولين وايي، سږ کال د ژمي له پیله تر اوسه په دغه ولایت کې پر نشه يي توکو روږدي ٤٥ کسان مړه شوي دي. د هرات د امنیې قوماندانۍ د نشه يي توکو پر وړاندې د مبارزې مدیر حیات الله روحاني وايي، په وروستیو دوو میاشتو کې په دغه ولایت کې پر نشه يي توکو روږدي ۴۵ کسان مړه شوي دي. د روحاني په خبره د ښار او ولسوالیو په کچه د امنیې قوماندانۍ، ښاروالۍ خلکو د ګذر وکیلانو او سیمه ییزې ادارې په ملاتړ د روږدو کسانو ټولولو بهیر پیل شوی دی. هغه زياته کړه چې د روږدو له راټولولو وروسته د ژمي په موسم کې د هغوی ګرم ساتلو لپاره هم تدابیر نیول شوي او د درملنې لړۍ يې هم پيلېږي. دا په داسې حال کې ده چې د کورنیو چارو وزارت هم تېره ورځ اعلان وکړ چې په هېواد کې د سختې یخنۍ له امله د دغه وزارت اړوند د نشه يي توکو پر وړاندې د مبارزې معینیت په سپارښتنه د هېواد په کچه څه باندې پر نشه يي توکو روږدي لس زره کسان له يخنۍ د ساتنې او درملنې لپاره راټول شوي او دا لړۍ دوام لري.
