پاکستاني رسنیو ویلي، چې د دغه هېواد د ټاکنو کمېسیون د پاکستان د مخکیني لومړي وزیر عمران خان د نیولو امر صادر کړی دی. پاکستاني رسنۍ ډان راپور ورکړی، چې د دغه هېواد د ټاکنو کمېسیون د تېرې سې شنبې په ورځ د عمران خان د نیولو حکم صادر کړی دی. د خپرو شویو معلوماتو له مخې د عمران خان د نیولو فرمان د محکمې احکامو ته د سپکاوي او سرغړونو ته د رسېدنې جلسې لپاره د نه حاضرېدو له امله صادر شوی دی. د پاکستان د ټاکنو په کمېسیون کې سرغړونو ته درسېدنې کمېټې مسوولینو په یوه ناسته کې د پاکستان د تحریک انصاف ګوند د مشر عمران خان او د دغه ګوند د دوو نورو غړو د نیولو حکم صدور ته رایه ورکړې ده. د پاکستان د ټاکنو کمیسیون د عمران خان او د هغه دوو نورو کسانو لپاره د وثیقې کارولو حق خوندي ګڼلی دی.
