د سالنګ لویه لار د سختو ورښتونو له امله د تګ راتګ پر مخ تړل شوې ده. د راپورونو له مخې په شمالي او جنوبي سالنګ کې سخت توپان او ورښت روان دی چې له همدې امله دغه لار د بار وړونکو موټرونو پر مخ تړل شوې ده. د سالنګونو د ساتنې اداره وايي چې له ترافیکي پېښو او تلفاتو د مخنیوي لپاره لاره تړل شوې او تر دویمې اطلاع پورې به د لویو موټرونو تګ راتګ منع وي. سرچینه کاږي چې مسافر وړونکي موټرونه د ژمنیو توکو په درلودلو سره کولی شي په دې لار تګ راتګ وکړي. سالنګ د هېواد مهمه مواصلاتي لار ده چې شمالي ولایتونه له مرکز کابل سره نښلوي، خو د ژمي په موسم کې وخت ناوخت د ورښتونو له امله د ترافیکو پر مخ تړل کېږي.
