د سوداګرۍ او صنایعو وزارت وايي د افغانستان د اقتصادي ځان بسیاینې او نړیوالې پانګونې او سوداګرۍ د راجلبولو هڅې یې ګړندۍ کړې دي. دغه وزارت وايي، داسې پلانونه او تګلارې پلي کوي چې له مخې يې په افغانستان کې پانګونه وهڅېږي او کاري زمينې هم پراخې شي. د سوداګرۍ او صنایعو وزارت ویاند عبدالسلام جواد وايي، پانګوونکو ته په کور دننه د خامو خوراکي او صنعتي موادو برابرول او د صادراتو د لوړولو هڅې او په افغانستان کې د پانګوونکو لپاره د شرایطو رامنځته کول د دوی د دغې تګلارې یوه مهمه برخه ده. د سوداګرۍ او صنایعو وزیر نور الدین عزیزي هم ویلي چې د خپلې نوې اقتصادي تګلارې له مخې پر هغو ځمکو چې پخوا د امریکا پوځ د اډو په توګه کارولې دوی پکې ځانګړي اقتصادي زونونه جوړوي او دا پلان د کابینې غونډې ته وړاندې کوي. هغه ویلي، د ایران، روسیې او چین په څېر هېوادونه په افغانستان کې پانګونې او له افغانستان سره سوداګرۍ ته لا هم لېوالتیا لري.
