د مخابراتو او معلوماتي ټکنالوژۍ وزارت وايي، د هېواد په لرو پرتو سیمو کې د مخابراتي خدمتونو د پراختیا او د خلکو د ستونزو د حل لپاره نوي اقدامات په پام کې نیول شوي دي. د دغه وزارت ویاند عنایتالله الکوزي ویلي، چې د مخابراتو وزیر ملا عبدالاحد فضلي ننګرهار او لغمان ولایتونو ته د سفر پر مهال د مخابراتي خدمتونو وضعیت ارزولی او د دغو خدمتونو د پراختیا ډاډ یې ورکړی دی. د الکوزي په وینا، د اترا ادارې د یوولسمې پروژې د قرارداد بهیر پیل شوی، چې په پلي کېدو سره به یې د فرضي کرښې په اوږدو کې پرتې او نورې لرې پرتې سیمې مخابراتي پوښښ ته داخلې شي. نوموړي زیاته کړې، چې د مخابراتو وزیر له اړوندو مسوولینو غوښتي، څو د همغږۍ او ګډو هڅو له لارې خلکو ته معیاري مخابراتي خدمتونه وړاندې کړي.








