د کډوالۍ نړیوال سازمان (ای او ایم) او د کډوالو په چارو کې د ملګرو ملتونو عالي کمېشنرۍ (یو اېن اېچ سي ار) وايي، پاکستاني چارواکو په یوه اوونۍ کې ۵۱۷ افغانان نیولي دي. د دغو دوو ادارو په ګډ راپور کې راغلي، چې دغه کسان د اکټوبر له ۱۱مې تر ۱۷مې پورې په بلوچستان، سند او خیبر پښتونخوا ایالتونو کې نیول شوي دي. د راپور له مخې، په نیول شویو کسانو کې ۸۳ سلنه د اوسېدو قانوني اسناد نه لري، ۹ سلنه د افغان تابعیت کارتونه (ACC) او ۸ سلنه د ثبت کارتونه (PoR) لري. راپور زیاتوي، چې په همدې موده کې ۳ زره او ۸۸۳ افغانان د تورخم، چمن او بهرامچې له لارو بېرته افغانستان ته ستانه شوي، چې ۴۹۹ تنه یې په جبري توګه ایستل شوي دي.
