د سمنګان ولایت په مرکز ایبک ښار او شپږو ولسوالیو کې د ۶۶ میلیونه او ۷۶۷ زره افغانیو په لګښت د ۲۵ پراختیايي پروژو چارې بشپړې او ګټې اخیستنې ته وسپارل شوې. د دغه ولایت د کلیو، بیارغونې او پراختیا ریاست انجنیر یما فرامرز رسنیو ته ویلي، چې دغه پروژې د همکارو موسسو په مالي ملاتړ پلې شوې دي. د نوموړي په وینا، په دغو پروژو کې د اوبو رسولو د ۱۲ شبکو جوړول او رغول، د استنادي دېوالونو جوړول، د کانالونو چارې او د اوبو د ښه مدیریت لپاره د ۶ زره او ۵۵۷ کوچنیو کندو کیندل شامل دي.
