د افغانستان د سوداګرۍ او پانګونې خونې عمومي رییس سید کریم هاشمي په مشرۍ پلاوي د ترکمنستان د سوداګرۍ او صنایعو خونې له رییس سره په لیدنه کې د دواړو هېوادونو ترمنځ د سوداګریزو او اقتصادي همکاریو پر پراختیا خبرې کړې دي. د افغانستان د سوداګرۍ او پانګونې خونه وايي، سید کریم هاشمي د ترکمنستان د سوداګرۍ او صنایعو خونې له رییس څخه غوښتي چې د یوه سوداګریز او اقتصادي پلاوي په مشرۍ افغانستان ته سفر وکړي. ترکمنستاني لوري دغه وړاندیز منلی او ویلي یې دي چې د روان کال په نومبر میاشت کې به د سوداګریز او اقتصادي پلاوي په مشرۍ افغانستان ته سفر وکړي. دواړو لورو ټینګار کړی چې د سوداګریزو اړیکو د پراختیا لپاره به د خصوصي سکټور ترمنځ د همکاریو د زیاتولو هڅې هم دوام ولري.
