د صنعت او سوداګرۍ وزیر نورالدین عزیزي د بلاروس د بهرنیو چارو له وزیر ماکسیم ریژینکوف سره په لیدنه کې د دواړو هېوادونو د سیاسي استازولیو د جوړولو او د سوداګریزو اړیکو د پراختیا په اړه خبرې کړې دي. د صنعت او سوداګرۍ وزارت د خبرپاڼې له مخې، دواړو لورو د افغانستان او بلاروس د سوداګرۍ فورم جوړولو، د پانګونې کنفرانس، د بانکي سیستم د اسانتیا، افغان سوداګرو ته د ویزو د ورکړې او د افغانستان د پنبهيي تولیداتو د ظرفیتونو د کارونې په اړه هم بحث کړی دی. د بلاروس د بهرنیو چارو وزیر ویلي، هېواد یې له افغانستان سره همکاریو ته چمتو دی او د افغانستان له لوري مطرح شوې موضوعات به له خپل ولسمشر سره شریک کړي. نوموړي همداراز ویلي، چې په نږدې راتلونکې کې به افغانستان ته سفر وکړي.
