د الجزیرې د راپور له مخې، ټاکل شوې د ایران د بهرنیو چارو وزیر عباس عراقچي په نیویارک کې د امریکا او ایران ترمنځ له منځګړو سره وګوري او د دواړو لورو وروستي وړاندیزونه او دریځونه وڅېړي. د ایران ایسنا خبري اژانس ویلي، د ایراني پلاوي او منځګړو ترمنځ به د وروستیو وړاندیزونو او اوسنیو دریځونو په اړه بحث وشي. په همدې حال کې، یو قطري پلاوی هم په امریکا کې دی. د راپورونو له مخې، دغه پلاوي تېره اوونۍ د اقتصادي مرستو په بدل کې د هرمز تنګي د پرانیستلو په اړه د ایران وړاندیز امریکايي چارواکو ته رسولی دی. خو د ایران تسنیم خبري اژانس راپور ورکړی چې د امریکا او ایران ترمنځ د مخامخ خبرو پلان نشته.
