د دوغارون د ازادې سیمې اجراییوي رییس محمدرضا مودودي ویلي، ایران د نړۍ د ټولو هېوادونو په پرتله افغانستان ته د توکو د صادراتو په برخه کې لومړی ځای لري. هغه ویلي، افغانستان ته د ایران د صادراتو ۶۰ سلنه د دوغارون له لارې ترسره کېږي، خو د دې سیمې له ظرفیتونو سمه ګټه نه ده اخیستل شوې. مودودي له ایراني ماشینجوړونکو فابریکو غوښتي چې په دوغارون کې فعالیت پیل کړي او ویلي یې دي، باید دغه سیمه له یوه ترانزیټي مسیر څخه د تولید او نړیوالې سوداګرۍ پر مهم مرکز بدله شي.
