له پېښو سره د مبارزې او چمتووالي ادارې او AWUDO مؤسسې ترمنځ د ۲۶۵ زره او ۹۱۹ ډالرو په ارزښت د ګډو همکاریو هوکړهلیک لاسلیک شوی دی. د پېښو پر وړاندې د مبارزې او چمتووالي ادارې لوی رئیس ملا نورالدین ترابي او د AWUDO مؤسسې د پروګرام مسوول خالد حقمل د هوکړهلیک د لاسلیک پر مهال ویلي، چې د دې پروګرام له مخې به د کونړ ولایت په څوکۍ او نورګل ولسوالیو کې له زیانمنو کورنیو سره بېلابېلې مرستې وشي. د مالوماتو له مخې، ۳۶۰ کورنیو ته به نغدي مرستې، ۱۵۰ کورنیو ته وزې یا مېږې او ۳۵۰ کورنیو ته به د حفظالصحې بستې ورکړل شي. همداراز، د کوچنیو کاروبارونو او مالدارۍ په برخه کې به روزنې ورکړل شي او د خیاطۍ، لاسي صنایعو او نورو مسلکي زدهکړو لپاره به روزنیز مرکزونه جوړ شي.
