متحده عربي اماراتو په لغمان ولایت کې د یوې لارۍ د چپه کېدو له امله د رامنځته شوې خونړۍ ترافیکي پېښې په تړاو له زیانمنو شویو کورنیو سره خپله خواخوږي ښودلې ده. د اماراتو د بهرنیو چارو وزارت ویلي، د پېښې د قربانیانو له کورنیو او د افغانستان له خلکو سره ژوره خواخوږي لري او دا پېښه یې یوه دردناکه ضایعه بللې ده. یاد وزارت د ټپیانو د ژر تر ژره روغتیا هیله کړې ده. د راپورونو له مخې، د کابل ـ جلالاباد پر لویه لار د پرونۍ پېښې له امله ۲۰ کسان، چې ۱۰ ماشومان هم پکې شامل وو، مړه شوي او ۳۵ نور ټپیان شوي دي.
