د ملګرو ملتونو د روغتیا نړیوال سازمان (ډبلیو ایچ او) ویلي،چې په کانګو او یوګانډا کې د «بونډيبوجیو» ویروس له امله د ایبولا ناروغۍ خپرېدو د عامې روغتیا بېړنی نړیوال حالت رامنځته کړی دی. یاد سازمان په خبرپاڼه کې ویلي، که څه هم وضعیت لا د نړیوالې وبا تر کچې نه دی رسېدلی، خو د ناروغۍ د پراختیا، د مشکوکو مړینو د زیاتوالي او د روغتیايي نظامونو د کمزورۍ له امله بېړنی حالت اعلان شوی دی. د راپور له مخې، د ۲۰۲۶ کال د مې تر ۱۶مې پورې د کانګو په ایتوري ولایت کې اته مثبتې پېښې، ۲۴۶ مشکوکې پېښې او ۸۰ مشکوکې مړینې ثبت شوې دي. همداراز، د یوګانډا په پلازمېنه کامپالا کې له کانګو څخه د ورغلو دوو کسانو کې د ایبولا مثبتې پېښې ثبت شوې چې له ډلې یې یو تن مړ شوی دی. د کانګو په پلازمېنه کینشاسا کې هم یوه مثبته پېښه ثبت شوې ده.
