په افغانستان کې د ټاپي پروژې د غځولو چارې ۵۵ کیلومتره پرمخ تللې دي. د کانونو او پټرولیم وزارت وایي، د پروژې د بسترسازۍ کارونه ۱۲۵ کیلومتره ته رسېدلي او د ګازو د لېږد لپاره لازم چمتووالی روان دی. چارواکي زیاتوي چې د ټاپي ګاز به نه یوازې د لېږد، بلکې د برېښنا تولید، اوبلن ګاز او مصنوعي ګاز په برخو کې هم وکارول شي. چارواکي وايي دغه پروژه به د انرژۍ کمښت راکم او د صنعت په وده کې مهم رول ولوبوي. د ټاپي پروژه، چې نوم یې د ترکمنستان، افغانستان، پاکستان او هند له لومړیو تورو اخیستل شوی، د سیمې له سترو ګاز لېږدونکو پروژو څخه شمېرل کېږي.
