له پېښو سره د مبارزې د چمتووالي ادارې ویلي چې د کابل د بګرامیو ولسوالۍ په یوه استوګنیزه سیمه کې له تېرو جګړو پاتې یو سل کیلوګرامه بم کشف او په خوندي ډول شنډ شوی دی. دغه بم د کیندنې پر مهال د هلوټرسټ ماینپاکۍ موسسې د تخنیکي ټیم په همکارۍ موندل شوی. چارواکي وايي چې په بم کې شاوخوا دوه څلوېښت کیلوګرامه چاودېدونکي توکي موجود وو او فیوز یې هم فعال و، چې د احتمالي خطر د مخنیوي لپاره له درې زرو څخه ډېرې د شګو بورۍ کارول شوې. وروسته له دې چې فیوز ترې وایستل شو، بم یوې خوندي سیمې ته انتقال او له منځه وړل شوی دی. یادې ادارې له خلکو غوښتي چې د شکمنو توکو د لیدو په صورت کې اړوند ادارو ته خبر ورکړي.
