د افغانستان د صنعت او سوداګرۍ وزیر نور الدین عزیزي د افغانستان لپاره د چین له ځانګړي استازي یوشیاو یونگ سره کتلي او د افغانستان پر سوداګرۍ او د پانګونې پر فرصتونو یې خبرې ور سره کړې دي. عزیزي ویلي اوسمهال په افغانستان کې د بهرنۍ پانګونې لپاره خوندي او مناسب چاپېریال برابر شوی او له چینایي پانګوالو یې وغوښتل چې د افغانستان په بېلابېلو اقتصادي برخو کې له موجوده فرصتونو ګټه پورته کړي او پانګونه وکړي. نوموړي همدارنګه د افغانستان د صادراتو د پراختیا او آسانتیاوو پر زیاتوالي ټینګار کړی، په ځانګړې توګه د پنبې، انارو، جلغوزو، قیمتي او نیمه قیمتي ډبرو او د افغانستان د نورو صادراتي توکو په برخه کې، او د دواړو هېوادونو ترمنځ د ګمرکي، ترانزیتي او ترانسپورتي آسانتیاو غوښتنه یې کړې ده. په مقابل کې، د چین ځانګړي استازي یوشیاو یونگ د افغانستان په بازار کې د چینایي سوداګرو او پانګوالو د ګډون لیوالتیا یادونه کړې ده او افغانستان یې د پانګونې په برخه کې یو د فرصتونو ډک هېواد بللی دی. هغه د دواړو هېوادونو د اړوندو ادارو د همکارۍ رول د خصوصي سکتور د ملاتړ او د اقتصادي اړیکو د پراختیا لپاره مهم بللی دی. په پای کې، دواړو لورو د دواړو هېوادونو د اړوندو ادارو د همکارۍ پر پراختیا ټینګار کړی، ترڅو د دواړو هېوادونو تر منځ سوداګري اسانه او پانګونه زیاته شي.
