د صنعت او سوداګرۍ وزارت خبر ورکړی، چې د دغه وزارت د وزیر نورالدین عزیزي په مشرۍ یو پلاوی چې د بلخ والي هم پکې ګډون لري ازبکستان ته سفر کړی دی. په دې سفر کې د یو شمیر سکټوري ادارو مشران، ملي سوداګر او پانګه وال هم ملګري دي. ویل کیږي افغان پلاوی به د یاد سفر پر مهال د ازبکستان لومړي وزیر مرستیال جمشیدخواجه یوف او له یو شمېر والیانو سره د سوداګریزو اړیکو په اړه په مهمه غونډه کې ګډون وکړي. افغان پلاوی داسې مهال ازبکستان ته روان شوی، چې تازه تاشکند کابل سره د سوداګریزې راکړې ورکړې زیاتولو ته لا ډېره لېوالتیا ښودلې ده.
