د غزني ولایت د صنعت او سوداګرۍ ریاست مسوولینو خبر ورکړی، چې روان کال له دغه ولایته ۱۳ زره مټریک ټنه بادام، ممیز او الوبخارا بهر ته صادره شوې ده. سرچینې ویلي، چې دغه وچه مېوه منځنۍ اسیا، ځینو عربي او اروپایي هېوادونو، چین، هند او ایران ته صادره شوې ده. ورته مهال یو شمېر ځایي سوداګر وایي، که څه هم په غزني کې د وچو مېوو تولید ښه دی، خو صادرات یې له ننګونو سره مخ دي او نړۍوالو مارکېټونو ته یې لېږد ستونزمن شوی دی. دغه سوداګر له اسلامي امارته غواړي چې د تورخم له بندېدو وروسته د توکو د لېږد لپاره باید غوره بدیلې لارې ومومي او لازمې اسانتیاوې ورته برابرې کړي.
