د خوست ولایت په باک ولسوالۍ کې د څلورو کورنیو ترمنځ لس کلنه دښمني د قومي مشرانو او ولایتي چارواکو په منځګړیتوب په دوستۍ بدله شوه. د مسوولینو په وینا، په دې دښمنۍ کې اووه کسان وژل شوي وو. د دښمنۍ ښکېلو کورنیو د روغې جوړې هرکلی کړی او ویلي یې دي چې له کړاوونو ډک ژوند یې پای ته رسېدلی. د خوست مرستیال والي له خلکو غوښتي چې خپلې شخړې د خبرو اترو له لارې حل کړي. د یادونې وړ ده چې څو ورځې وړاندې هم د دغه ولایت په تڼیو ولسوالۍ کې د دوو کورنیو ترمنځ یوولس کلنه دښمني په روغه جوړه پای ته رسېدلې وه.
