د کورنیو چارو وزیر خلیفه سراجالدین حقاني د پولیسو بنسټیز مسلکي کورس شپږمې دورې د فراغت مراسمو کې ویلي، هغه افسران چې د اسلامي عقیدې او مسلکي روزنې په روحیه سمبال دي، کولی شي ولس ته ارزښتمن خدمتونه وړاندې کړي. نوموړي د امنیت ټینګښت، د جرمونو د مخنیوي او د نظام د پیاوړتیا په برخه کې د پولیسو رول مهم بللی او زیاته کړې یې ده، چې د پولیسو مسلکي کېدل د ټول هېواد د ثبات لپاره بنسټیز ارزښت لري. هغه د هېواد امنیت او ثبات د سیمې او نړۍ لپاره مهم بللی او ویلي یې دي، چې نړۍوال او ګاونډي هېوادونه باید د دې بهیر ملاتړ او د دوام په برخه کې یې همکاري وکړي. حقاني له پوليسو وغوښتل چې، خلکو سره نېک چلند او د قانون تطبيق په برخه کې د ولسي خدمت اصول په خپلو چارو کې مراعات کړي، څو د خلکو باور او همکاري لا پیاوړې شي.
