د سره صلیب او سرې میاشتې ټولنې نړیوال فډراسیون راپور ورکړی، چې په ۲۰۲۵ کال کې یې څه باندې ۲ میلیونو ناروغانو ته روغتیايي خدمتونه وړاندې کړي دي. د راپور له مخې افغانستان تېر میلادي کال د کډوالو د راستنېدو، طبیعي پېښو او وچکالۍ په ګډون له ګڼو ناورينونو سره مخ و. سره صلیب زیاته کړې چې د دغه فډراسیون تر ملاتړ لاندې ۱۲۸ روغتیايي مرکزونه تمویل شوي او خپل فعالیتونه یې هم پراخ کړي دي. د یاد بنسټ په خبره ۶۰ سلنه هغه کسان چې روغتیايي خدمتونه یې ترلاسه کړي، ښځې او نجونې دي . سرچینې زیاته کړې، چې په تېر یوه کال کې ۱۳ زره کسانو رواني او ټولنیز خدمتونه ترلاسه کړي چې ۸۳ سلنه یې ښځې دي.
